"Ролан Гаррос". Ига Свёнтек рақибасини "сочиб" ташлади

Польшалик теннис маликаси Франция Очиқ чемпионатининг тўртинчи даврасида WTA рейтингида 41-ўринни эгаллаб турган россиялик Анастасия Потаповани "сухой" ҳисобда мағлубиятга учратди - 6/0, 6/0. Учрашув бор йўғи 40 дақиқа давом этган. Бу теннисчиларнинг ўзаро ўтказган илк учрашуви эди. 

Ига Свёнтек 3 та эйс, 6 та брейкни амалга оширди, қўшхатога йўл қўймади. Потапова фаолиятида илк бор 0/6, 0/6 ҳисобида ютқазди. Свёнтек эса бешинчи маротаба рақибаларига битта ҳам геймни ютиб олиш имконини бермай ғалаба қозонди. Энди "Ролан Гаррос" турнирининг амалдаги чемпиони 1/4 финалда чехиялик Маркета Вондроушовага қарши кортга чиқади.