"Ролан Гаррос". Каспер Рууд ҳамда Александр Зверев ўртасидаги ярим финал баҳси ҳам якунига етди

Аввалроқ, турнирнинг эркаклар ўртасидаги илк ярим финал баҳсида сербиялик Новак Жокович (3) испаниялик Карлос Алькарасни (1) мусобақадан чиқариб юборган эди.

Бироз аввал турнирда иккинчи ярим финалчи номи ҳам маълум бўлди. Норвегиялик Каспер Рууд (4) ҳамда Германия вакили Александр Зверев (27) баҳси икки соат-у ўн бир дақиқа давом этди ва унда Рууд 3:0 (6/3, 6/4, 6/0) ҳисобларида ғалаба қозонган ҳолда финалга йўл олди.

Учрашув давомида Рууд 5 маротаба, Зверев эса уч маротаба эйс йўллашга эришди. Қўшхатолар эса Александрда кўпроқ бўлди: 2-1.

Бу теннисчилар ўртасидаги ўзаро тўртинчи ўйин бўлди. Ушбу учрашувларнинг иккитасида Зверев ғалаба қозонган бўлса, қолган иккисида Рууднинг қўли баланд келган.

Эндиликда Фрация Очиқ чемпионатининг финал баҳсида Каспер Рууд Новак Жоковичга қарши кортга чиқади. Мазкур ўйин эртага (11 июнь) бўлиб ўтади.