"Роллан Гаррос"нинг учинчи даврасига қайси сараланган теннисчилар етиб келди?

"Ролан Гаррос"нинг эркаклар ўртасидаги баҳсларида 2009 йилдан бери биринчи марта барча сараланган 12 нафар ўйинчи учинчи босқичга чиқди.

Барча етакчилар мусобақанинг дастлабки икки босқичидан ўтишди. Жиддий муаммолар фақат германиялик Александр Зверев ва испаниялик Карлос Алкарас билан юзага келди.

Аёллар ўртасидаги баҳсларга эса Топ-10'нинг фақат учта вакили етиб келди. Улар дунёнинг биринчи ракеткаси, польшалик Ига Свёнтек, испаниялик Паула Бадоса (3) ва беларуслик Арина Соболенко (7).

Мусобақа стартида чехиялик Барбора Крейчикова (2), тунислик Онс Жабер (6), эстониялик Анетт Контавейт (5) ва испаниялик Гарбин Мугуруза (10) мағлуб бўлди. Иккинчи даврада эса курашни грециялик Мария Саккари (4), чехиялик Каролина Плишкова (8) ва америкалик Даниель Коллинз (9) тўхтатди.