Романо Возиньянинг янги клуби номини маълум қилди

Бу ҳақда журналист ва инсайдер Фабрицио Романо Х ижтимоий тармоғида хабар берди.

Манба маълумотига кўра, Кабо-Вердедан бўлган дарвозабоннинг трансфери бўйича оғзаки келишувга эришилган. Ҳужжатлар тез орада имзоланиши керак. Инсайдернинг таъкидлашича, бу дам олиш кунлари юз бериши лозим, шундан сўнг Возинья тиббий кўрикдан ўтиш учун жўнаб кетади. Дарвозабоннинг ўзи Чилидаги фаолиятининг янги саҳифасига тайёр.

Аввалроқ "Коло-Коло" клуб президенти Анибаль Мосанинг топшириғига биноан 40 ёшли дарвозабон билан музокаралар ўтказгани хабар қилинган эди. Чили клубига қадар футболчига асосий даъвогар сифатида аргентиналик Лионель Месси тўп сурадиган АҚШнинг "Интер Майами" клуби кўрилаётган эди.

Возинья ЖЧ-2026да тўртта ўйин ўтказиб, уларнинг иккитасида ўз дарвозаси дахлсизлигини сақлаб қолди. Унинг Португалиянинг иккинчи дивизионида иштирок этувчи "Шавиш" клуби билан шартномаси шу ёзда якунига етган эди. Кабо-Верде терма жамоаси ўз тарихида илк бор жаҳон чемпионатининг финал босқичида иштирок этди ва 1/16 финалда Аргентинага имкониятни бой бериб (2:3), мусобақадаги иштирокини якунлади.