Рўзибоев — Пейж: Октагонда ким ўз ўйинини ўтказа олади? (мутолаа учун)

Рўзибоев ҳозир UFC ўрта вазн рейтингида 15-ўринда турибди, Пейж эса ярим ўрта вазндан қайтиб, ўрта вазн дивизионида яна бир бор куч синашади.

Нурсултон Рўзибоев — Майкл Пейж: бу жангда кимнинг имконияти юқори? 

Ҳамюртимиз Нурсултон Рўзибоев UFCдаги энг жиддий синовларидан бирига тайёрланмоқда. 5 сентябрь куни Парижда у ўзининг ностандарт услуби ва узун қўллари билан танилган Майкл «Веном» Пейжга қарши октагонга чиқади.

Рўзибоев учун бу шунчаки навбатдаги жанг эмас. 32 ёшли спортчи сўнгги йилларда UFCдаги позициясини мустаҳкамлаб, энди рейтингда юқорилаш ва юқори даражадаги рақибларга қарши ўзини исботлаш босқичига кирди.

Рўзибоевнинг асосий устунлиги — партер

Нурсултон Рўзибоевнинг профессионал рекорди 37 ғалаба, 9 мағлубият ва 2 дурангдан иборат. Унинг 37 та ғалабасидан 21 таси бўғиш ёки оғриқли усуллар орқали, 13 таси нокаут билан якунланган. Шунингдек, 26 та жанги биринчи раунднинг ўзида тугаган. UFCдаги расмий профилида ҳам юртдошимизнинг финиш кўрсаткичи 80 фоиз экани қайд этилган.

Бу рақамлар Рўзибоевнинг жангда нимани хоҳлашини аниқ кўрсатади: у рақибини узоқ масофада очколар ҳисобига енгишдан кўра, уни хато қилишга мажбурлаб, жангни муддатидан олдин тугатишга интилади.

27 июнь куни Бокуда Андрей Пуляевга қарши жангда ҳам худди шу ҳолат кузатилди. Рўзибоев биринчи раунднинг иккинчи дақиқасида рақибини бўғиш усули билан таслим қилди. Бу унинг UFCдаги учинчи кетма-кет ғалабаси бўлди.

Пейж эса бутунлай бошқа услубда жанг қилади

Майкл Пейж — Рўзибоев учун услуб жиҳатидан жуда ноқулай рақиб.

39 ёшли британиялик спортчи ўзининг ғайриоддий ҳаракатлари, масофани назорат қилиши, реакцияси ва зарбаларни кутилмаган бурчаклардан йўллаши билан танилган. Унинг профессионал рекорди 25–3.

Пейжнинг асосий вазифаси — Нурсултонга яқинлашиш имконини бермаслик.

Тасаввур қилиб кўрадиган бўлсак, Нурсултон Рўзибоев масофани қисқартириб, жангни клинч ва партерга ўтказишга ҳаракат қилади; Пейж эса аксинча, жангни тик ҳолатда ушлаб туришга интилади.

Нурсултон Рўзибоев учун энг катта хавф

Андижонлик атлетнинг узунлиги ва физик параметрлари унга кўплаб рақибларга қарши устунлик беради. Аммо Пейжнинг ҳаракатчанлиги ва вақтни тўғри бошқара олиш ҳисси бу устунликни камайтириши мумкин.

Британиялик жангчи икки марта ўрта вазнда октагонга чиқиб, Шара Буллет ва Жаред Каннонирга қарши жангларда ғалаба қозонган. Кейин ярим ўрта вазнга тушиб, Сэм Паттерсонни ҳакамлар қарори билан мағлуб этган. Энди у яна 84 кг вазнга қайтмоқда.

Шунинг учун Рўзибоев учун биринчи раунд айниқса муҳим бўлади. Агар у Пейжнинг ҳаракатини чеклаб, уни октагонга сиқиб қўйса, ўзининг кучли томони — клинч ва грэпплингни ишга солиши мумкин бўлади. Умуман олганда, Нурсултон Рўзибоев сўнгги 14 жангида 13 марта ғалаба қозонган. Бу кўрсаткич унинг ҳозирги формаси тасодиф эмаслигини кўрсатади. Бу жангдаги ғалаба Нурсултонни рейтингда янада юқори кўтарилиши учун муҳим қадамга айланиши мумкин. UFC расмий маълумотида у ҳозир ўрта вазн рейтингида 15-ўринда қайд этилган.

Энг муҳими, у яна бир танилган ва юқори даражадаги рақибни енгса, Рўзибоевнинг дивизиондаги мақоми ўзгаради. Энди гап шунчаки UFCда ғалаба қозониш ҳақида эмас — юқори рейтингдаги жангчилар қаторига кириш ҳақида кетмоқда.

5 сентябрь куни Париждаги октагонда Рўзибоев учун асосий вазифа — Пейжнинг жанг услубини қабул қилмаслик, балки ўз сценарийсини мажбуран ўтказиш бўлади.