РОЗКда маҳалла аҳолиси иштирокида шахмат мусобақаси ташкил этилди

Мусобақа Халқ депутатлари Чилонзор туман Кенгаши депутати, айни вақтда Республика олимпия захиралари коллежи директори вазифасини бажариб келаётган Аброр Мамадалиев ташаббуси билан ташкил этилди.

Шахмат мусобақасида таълим муассасасига ёндош Лутфий, “Учтепа”, “Оқтепа”, шунингдек, Чилонзор туманининг турли маҳаллаларида истиқомат қилувчи 30 нафардан зиёд турли ёш тоифасига мансуб шахматсеварлар иштирок этишди.

Олимпия тизимида ўтказилган ва муросасиз кечган баҳслар якунига кўра, 1-ўринни Лутфий номли маҳалла фуқаролар йиғини фаоли Дилмурод Рихсиев эгаллади. У ҳал қилувчи баҳсда “Учтепа” МФЙ фаоли Асад Шокировга қарши дона сурди ҳамда якунда ғолибликни қўлга киритди. Кучли учликка “Дўмбиробод” маҳалласида истиқомат қилувчи шахмат ишқибози Баҳодир Содиқов якун ясаб берди.

Баҳслар якунида ғолиб ва совриндорлар, шунингдек фаол иштирок этган шахматсеварлар ташкилотчилар томонидан диплом ва эсталик совғалари билан тақдирланишди.