10 фев 15:03
Янгиликлар

Оғир атлетика

Руслан Нурудинов ва Шарофиддин Амриддинов силтаб кўтариш баҳсларини ҳам якунлади. Ҳамюртларимиз Осиё чемпионатини қандай натижа билан тугатди?

Тошкентда давом этаётган оғир атлетика бўйича катталар ўртасидаги Осиё чемпионатида -109 кг вазнда силтаб кўтариш беллашувлари якунланди.

Унда Ўзбекистон терма жамоасининг икки нафар вакили - Руслан Нурудинов ва Шарофиддин Амриддинов иштирок этди.

Силтаб кўтариш натижаларга кўра, Нурудинов 207 кг тош кўтариб, олтин медални қўлга киритди. 205 кг натижа қайд этган Амриддинов эса иккинчи бўлди.

Руслан Нурудинов икки кураш якунига кўра ҳам тенгсиз бўлди. Унинг умумий кўрсаткичи 382 кгни ташкил этди. Амриддиновда эса бу кўрсаткич 381 кгни қайд этди.

Аввалроқ, Амриддинов даст кўтариш баҳсларида олтин, Нурудинов эса кумуш медални қўлга киритган эди.

Шу тариқа, Руслан Нурудинов Осиё чемпионатини 2 та олтин ва 1 та кумуш, Шарофиддин Амриддинов эса 1 та олтин ҳамда 2 та кумуш медаль билан якунлади.