Рустам Қосимжонов асосий рақибларидан бирини мағлуб этди

Кеча куннинг иккинчи ярмида мусобақанинг учинчи  тур учрашувлари ўтказилди. Турнирда биринчи рақам остида сараланган Рустам Қосимжонов ушбу турда муҳим ғалабаларидан бирини қўлга киритди. 17-жаҳон чемпиони оқ доналарда қозоғистонлик халқаро гроссмейстер Пётр Костенкони таслим этди ва очколарини 2,5тага етказиб олди. 

Қозоғистонлик яна бир халқаро гроссмейстер Ринат Жумабоев кетма-кет учинчи ғалабасига эришди ва турнир жадвалида якка пешқадам бўлиб олди. Жумабоев ўзи сингари мағлубиятсиз одимлаётган ватандоши Муртаз Кажгалеевдан устун келди. 

Ҳамюртларимиз Тоҳир Воҳидов ва Нодирбек Ёқуббоев баҳсида дуранг қайд этилди. Ёш халқаро гроссмейстеримиз Жаҳонгир Воҳидов қора доналарда ўйнашига қарамай, тожикистонлик Муҳаммад Хусанхўжаевни енгди. Тажрибали гроссмейстеримиз Марат Жумаев Элбек Жумановга ютқазиб қўйди. Яна бир ёш гроссмейтеримиз Жавоҳир Синдаров қора доналарда афғонистонлик Сафи Аҳмадни мағлубиятга учратди. 

Бугун 4-турда Рустам Қосимжонов қора доналарда Нодирбек Ёқуббоев билан муносабатларига ойдинлик киритиб олади. Пешқадам Ринат Жумабоев ҳамюртимиз Ортиқ Ниғматовга қарши қорада доналарда ҳаракат қилади. Ёш гроссмейстерларимиз Жавоҳир Синдаров ва Нодирбек Абдусатторов ўртасидаги партия ҳам кўпчиликнинг диққат эътиборида бўлади.