Рустам Қосимжонов Евро-Осиё турнирида 12-ўринни эгаллади

Унда жами 104 нафар спортчи иштирок этди. Уларнинг 62 нафари гроссмейтерлардир. Йигирма икки партиядан иборат турнирда юртимизнинг  кўзга кўринган вакиллари ҳам иштирок этишди.

Улар орасида Рустам Қосимжонов, Жаҳонгир Воҳидов, Тоҳир Воҳидов каби етакчи спортчиларимизни таъкидлаш ўринли. Швейцарча тизимда ўтказилган турнир якунида тожикистонлик Фаррух Аманотов 16 очко билан қўшимча кўрсаткичларга кўра бош совринни қўлга киритди.

Эътиборлиси, у дунё рейтингида етакчилар сафида бораётган озарбойжонлик Шахриёр Мамадиёровни икки бор мағлуб этди. Шунча очко жамғарган россиялик гроссмейстер Ян Непомняший эса иккинчи ўринни банд этди. Пешқадамлардан ярим очко ортда қолган грузиялик Баадур Жобава кучли учликка якун ясади.

Вакилларимиз орасида энг яхши натижани 14 очко жамғарган Рустам Қосимжонов қайд этди – 12-ўрин. Бу борада Руслан Пономарёв, Рауф Мамедов, Шахриёр Мамадиёров, Ван Хао, Александр Гиришук каби жаҳоннинг етакчи гроссмейстерлари янада қуйи ўринлардан жой олишди.

Мусобақа ғолибига 30 минг АҚШ доллари, иккинчи ўрин соҳибига эса 20  минг доллар тақдим этилди.