Рустам Қосимжонов ёш шахматчимизни юта олмади

Бугун мусобақа доирасида иккита тур учрашувлари ўтказилиши ҳақида хабар берган эдик. Бундан бир неча дақиқа аввал учинчи тур партиялари якунланди. Мусобақада биринчи рақам остида сараланган Рустам Қосимжонов кутилмаган натижа қайд этди. 

17-жаҳон чемпиони оқ доналарда ўйнашига қарамай, ёш шахматчимиз Ортиқ Ниғматовни мағлуб эта олмади. Учрашувда дуранг натижа қайд этилди. Иккала шахматчи ҳам учинчи тур олдидан 1,5 тадан очкога эга бўлиб туришибди. 

Қосимжоновнинг очко йўқотишидан қозоғистонлик халқаро гроссмейстерлар - Ринат Жумабоев, Пётр Костенко ва Муртаз Кажгалеев унумли фойдаланиб қолди. Уларнинг бари рақибларини мағлубиятга учратиб, очколарини иккитага етказиб олишди. 

Жумабоев яна бир халқаро гроссмейстеримиз Жаҳонгир Воҳидовни, Кажгалеев афғонистонлик Сафи Аҳмадни, Костенко эса юртдоши Ануар Исмагамбетовни таслим этди. Айни дақиқаларда 3-партия ўйналмоқда. Қосимжонов оқ доналарда Пётр Костенкога қарши баҳс олиб боряпти.