Саккиз карра Олимпиада чемпиони Усэйн Болт жароҳат олди, уни замбилда олиб чиқиб кетишди + ФОТО

Ямайкалик афсонавий енгил атлетикачи 8 карра Олимпиада, 11 карра жаҳон чемпиони ҳисобланади. Кеча Англия ва жаҳон афсоналари ўртасида футбол бўйича халқаро хайрия ўйини бўлиб ўтганди. Болт жаҳон афсоналари терма жамоаси таркибида марказий ҳимоячи позицияда ўйнади. У таниқли ҳужумчи Жермейн Дефо билан тўқнашувда жароҳат орттириб олди. Шифокорлар Усэйнни майдондан замбил ёрдамида олиб чиқиб кетишган. 

Эслатиб ўтамиз, Болт спортчилик фаолияти давомида 8 та жаҳон рекордини янгилашга муваффақ бўлган. Усэйн 100 ва 200 метр спринтерлик масофасида кетма-кет учта Олимпиадада (Пекин-2008, Лондон-2012 ва Рио-де-Жанейро-2016) олтин медалларини қўлга киритган ягона спортчи ҳисобланади.