Самарқандда “Ёшлар куни” муносабати билан веломарафон ўтказилди

Ушбу ташаббуслардан иккинчиси бўлган жисмоний тарбия ва спорт йўналишидаги вазифалар ижросини таъминлаш ҳамда 30 июнь - “Ёшлар куни” муносабати билан Самарқанд шаҳрида “Биз соғлом турмуш тарафдоримиз” шиори остида веломарафон ўтказилди.

Қатор ҳамкор ташкилотлар томонидан ўтказилган веломарафонда 7 ёшдан 70 ёшгача бўлган спорт ва соғлом турмуш тарзи тарафдорлари бўлган 3000 нафарга яқин самарқандликлар Регистон кўчаси – Университет хиёбони йўналиши бўйлаб тўрт километрлик масофани босиб ўтишди.

Мусобақа якунига кўра ўсмирлар ўртасида Давлат Акрамов “Энг ёш веломарафончи” сифатида тақдирланган бўлса, қизлардан Мухлиса Сақулова ушбу номинация сазовор бўлди.

Шунингдек, Иззатулло Ҳамрақулов ва Олим Ашуров энг ёши улуғ веломарафончилар сифатида эътироф этилди. Ғалабага бўлган интилиши учун Зуҳриддин Ишназаров ва Гулчеҳра Абдураҳмонова ташкилотчиларнинг эсдалик совғалари билан тақдирланишди.