18 фев 08:09
Янгиликлар

Теннис

Саралашда мағлуб бўлган Истомин омад сабаб асосий тўрга йўл олди

АҚШнинг Флорида штати Делрей-Бич шаҳрида ўтказилаётган теннис бўйича мукофот жамғармаси 673 655 АҚШ долларини ташкил этувчи мусобақанинг асосий тўр баҳслари бошланди.

Ушбу турнирда ҳамюртимиз Денис Истомин ҳам иштирок этяпти. Мамлакатимизнинг биринчи ракеткаси саралаш баҳсларининг 1/2 финалида испаниялик таниқли теннисчи Гильермо Гарсия-Лопесни 7:5, 6:2 ҳисобида мағлубиятга учратганди.

Аммо Истомин асосий тўрга йўлланма берувчи учрашувда америкалик Ной Рубинга имкониятни бой бериб қўйганди - 4:6, 6:3, 6:7(6). Шунга қарамай, Денис барибир асосий тўрда қатнашадиган бўлди.

Турнир ташкилотчилари Истоминга LL-Лаки Лузер, яъни бахтли ютқазган теннисчи учун аталган асосий тўр чиптасини тақдим этишди. Денис биринчи даврада мусобақанинг иккинчи сараланган теннисчиси, канадалик Милош Раоничга қарши кортга чиқади.