Сардор Рашидов яна жамоасини ўзгартиради

Норасмий маълумотларга кўра, унга Саудия ва Қатар клублари таклиф билан чиққан.

Рашидов Қатар Юлдузлар Лигасидаги фаолиятидан кейин Амирлик чемпионатига келиб қўшилганди. Аввалроқ Осиёнинг 2016 йилдаги энг яхши футболчиси Умар Абдулраҳмон Рашидовни “Ал-Айн” сафига чорлади. Бироқ футболчининг ўзи “Ал-Жазира”ни афзал билди.

Аммо Рашидов ўзининг орзуси бўлган клублар ўртасидаги Жаҳон Чемпионатининг бирорта ўйинида майдонга туширилмади. У “Ал-Жазира”нинг тўлақонли асосий футболчисига айлана олмади.

Футболчига айнан қайси клублар қизиқиш билдираётгани борасида маълумот йўқ. “Ал-Айн” яқиндагина Аҳмад Ҳалилни ўз сафига қўшиб олгани ҳисобга олинса, Рашидов эндиликда бу клубга керак бўладими ёки йўқ — айтиш қийин. Шунингдек, унинг “Ал-Жазира” билан шартномаси қай тариқа бекор бўлиши борасида ҳам аниқ маълумотлар йўқ.

БАА чемпионатида Рашидовдан ташқари Отабек Шукуров, Азиз Ҳайдаров ва Игорь Сергеев каби футболчилар ҳам тўп суради. Уларда ҳозирча ҳаммаси жойида.