Сена дарёсида заҳарланган Олимпиада чемпиони ёпилиш маросимида ўз давлати байроғини кўтара олмади

Жумладан, ирландиялик сузувчи, 800 метр масофага эркин усулда сузиш баҳсларида Олимпиада олтин медалини қўлга киритган Дэниел Уиффен шифохонага ётқизилган. Айнан шу сабаб билан у Олимпия ўйинларининг тантанали ёпилиш маросимида иштирок эта олмаган. Уиффен Ирландиянинг байроқдори бўлиши керак эди. 

"Мен ватанимнинг Олимпиада ёпилиш маросимида байроқдори бўлишим керак эди. Лекин инфекция сабаб бу имкониятдан маҳрум бўлдим. Ўзимни ёмон ҳис қилганим учун шифохонага боришимга тўғри келди. Ҳозир ўзимни анча яхши ҳис қиляпман", — деди ирландиялик спортчи. 

Шунингдек, 23 ёшли Уиффен Париж Олимпиадасида 1500 метр масофага эркин сузиш баҳсларида бронза медалига сазовор бўлди. У Сена дарёсида, очиқ сувда ўтказилган 10 км масофага сузиш баҳсларидан сўнг шифокорларга мурожаат қилган. Уиффен финишга ўн саккизинчи ўринда етиб келганди. Ёпилиш маросимида унинг ўрнини бошқа бир сузувчи Мона Макшерри эгалади.