Шаҳзодбек Шаробиддинов WBA Asia камари соҳиби!

FW1 промоутерлик компанияси томонидан ташкил этилган ушбу бокс оқшомининг марказий жангида ҳамюртимиз Шаҳзодбек Шаробиддинов (6-1) кореялик Сон Кван Лига қарши рингга кўтарилди. Ўн раунд тўлиқ давом этган жангда чарм қўлқоп устамиз ҳакамларнинг якдил қарори билан очколар ҳисобига кўра ғалаба қозониб, WBA Asia камарини қўлга киритди. 

Эслатиб ўтамиз, бугунги турнирда "Фавзул Мунаввар" промоутерлик клубининг барча 5 нафар боксчиси рақибларини мағлуб этишни уддалашди.

Ҳамюртларимизнинг иштирокини Дониёрбек Ҳайиталиев чиройли ғалаба билан бошлаб берди. 67 кг вазн тоифасидаги ҳамюртимиз биринчи раунднинг ўзида асли ўзбекистонлик, ҳозирда Корея Республикаси шарафини ҳимоя қилаётган Абдулла Ниғматовни техник нокаутга учратди.

74 кг вазн тоифасида кечган 6 раундлик жангда ҳамюртимиз Эгамберди Нуриддинов Корея Республикаси вакили Дае Хюн Баекни ҳакамларнинг якдил қарори билан мағлубиятга учратди.

59 кг вазн тоифасида рингга кўтарилган боксчимиз Сирожбек Исмоилов 6 раунд тўлиқ давом этган жангда кореялик рақиби Ин Ҳо Чойни очколар ҳисобига кўра мағлубиятга учратди.

53.5 кг вазн тоифасидаги боксчимиз Ҳусниддин Мараимов 6 раунд тўлиқ давом этган жангда кореялик Ин Су Жангни очколар ҳисобига кўра таслим этди.