16 окт 15:46
Янгиликлар

Бокс/ММА

Шара Буллет собиқ UFC чемпионига қарши жанг қилади

UFC`нинг ўрта вазн тоифасида иштирок этувчи 32 ёшли россиялик Шарабутдин Магомедовнинг навбатдаги жанги бўйича тафсилотлар маълум бўлди.

Кўпчиликка "Шара Буллет" номи билан танилган аралаш яккакураш устаси ўзининг навбатдаги жангини 84 кг гача вазн тоифасидаги UFC собиқ чемпиони, нигериялик Исраэль Адесаньяга қарши ўтказади. Жанг 5 декабрь куни Саудия Арабистонининг Ар-Риёд шаҳрида бўлиб ўтадиган UFC Fight Night 295 турнири доирасида ташкил этилиши режалаштирилган.

Бу ҳақда нуфузли канадалик журналист ва инсайдер Ариэль Хельвани ўзининг Х ижтимоий тармоғидаги саҳифасида маълум қилди.

Шунингдек, таъкидлаш жоизки, дастлаб ушбу тадбирни 28 ноябрь куни ўтказиш режалаштирилган эди. Оқшомнинг 5 декабрга кўчирилиши сабаблари ҳозирча очиқланмаган.

Маълумот учун, Шарабутдин ўзининг профессионал ММА фаолиятида 17 ғалаба (шундан 12 таси нокаут билан) ва битта мағлубиятга эга. Магомедов аралаш яккакурашлардаги профессионал дебютини 2017 йилнинг декабрь ойида ўтказган.

Нигериялик жангчининг профессионал ММА рекордида эса 24 та ғалаба (шундан 16 таси нокаут билан) ва олтита мағлубият қайд этилган.