Шахмат. Абдусатторовнинг кутилмаган мағлубияти

Айлана тарзда ўтказилаётган эркаклар ўртасидаги мусобақада 5 нафар халқаро гроссмейстер - Нодирбек Абдусатторов (2550, чемпионатнинг биринчи рақамли иштирокчиси), Сайдали Йўлдошев (2469), Марат Жумаев (2451), Алексей Барсов (2411) ва Тохир Воҳидов (2400) дона суряпти. 

Олтинчи турда дунё тарихидаги энг ёш иккинчи халқаро гроссмейстер мақомига эришган Нодирбек Абдусатторов кутилмаганда мағлубият аламини тотиб кўрди. Тўрт очко билан якка пешқадам бўлиб турган Нодирбек оқ доналарда дона суришига қарамай, Улуғбек Тиллаевга имкониятни бой берди. 

Ёш шахматчимиз Жавоҳир Синдаров қора доналарда ўйнаб, тажрибали Сайдали Йўлдошевни мағлубиятга учратди. Бу турда Абдумалик Абдусалимов, Марат Жумаев, Тоҳир Воҳидов, Нодирбек Ёқуббоев ғалабага эришди. 

Бугун ўтказиладиган еттинчи тур олдидан бирйўла беш нафар шахматчи -Никита Хорошев, Жавоҳир Синдаров, Шамсиддин Воҳидов, Нодирбек Абдусатторов ва Нодирбек Ёқуббоев 4тадан очко жамғариб пешқадамлик қилишяпти.