Шахмат федерацияси йил ҳисобидан сўнгги турнирни ўтказди

Янги йил байрами олдидан ташкил этилган 2017 йилнинг сўнгги тақвим мусобақасида 53 нафар спортчи ғолиблик йўлида дона сурди. Ўғил болалар ўртасидаги баҳсларда Адел Раҳмон (FM) 7 имкониятдан 6,5 очко тўплаб, ғолиб бўлди.

Кубок соҳибига айланган Адел 6 ғалаба ва бир дуранг қайд этди. Тўртта ғалаба ва 3та дуранг қайд этган Георгий Шванов 5,5 очко билан иккинчи ўринни эгаллади. Шунча очко жамғарган Жамшид Султонов бронза медалига сазовор бўлди.

Қизлар ўртасидаги турнирда Юлия Хегай (WCM) 5 очко билан шохсупанинг энг юқори поғонасига кўтарилди. Фахрийлар орасида Лев Ким 5 очко билан турнир чемпиони бўлди. 14 ёшгача бўлган шахматчилар баҳсида Шерзод Самандаров 5 очко билан чемпионга айланди.

Халқаро рейтинг очколарини берувчи ушбу мусобақанинг блиц баҳсларида 43 нафар шахматчи иштирок этди. Самарқандлик Далер Воҳидов 7 имкониятдан 6,5 очко жамғариб, блиц турнири ғолиби бўлди.

Кучли учликдан Фотих Абдухолиқов (6 очко) ва Жамшид Султонов (5,5 очко) жой олишди. 14 ёшлилар мусобақасида Умида Омонова, қизлар ўртасида Маҳлиё Ҳакимова олтин медалга сазовор бўлди.