Шахмат. Жаҳон чемпионатининг 9-турида биргина Раҳмон ғалаба қозонди

Унда Ўзбекистон ўсмир ва ёшлар терма жамоаси аъзолари ҳам ўз имкониятларини синовдан ўтказишяпти. 14 ёшгача ўсмирлар ўртасидаги баҳсларда юртимиз спорт шарафини ҳимоя қилаётган Нодирбек Ёқуббоев 9-тур учрашувида қора доналарда ҳаракат қилиб, россиялик Семен Ломасовга ютқазиб қўйди.

Ёқуббоев ушбу мағлубиятдан сўнг 6 очко билан қўшимча кўрсаткичларга кўра 9-ўринга тушиб кетди. Бугун Нодирбек ўзи сингари 6 очкога эга бўлиб турган россиялик Ярослав Ремизовга қарши дона суради.

16 ёшлилар гуруҳида қатнашаётган Сайдали Саидакбаров 9-турда америкалик Тиглон Брюсга қарши қора доналарда ўйнаб, дуранг қайд этди. Бугун Сайдали оқ доналарда мезбонлар вакили Тимур Трубчанинов билан муносабатларига ойдинлик киритиб олади.

16 ёшлилар гуруҳида иштирок этаётган шахматчимиз Нилуфар Ёқуббоева бу турда мағлубият аламини тотиб кўрди. Оқ доналарда ўйнашига қарамай, у ҳиндистонлик Приянкага имкониятни бой берди. Беш ярим очко билан 11-поғонадан жой олган Нилуфар бугун мўғулистонлик Амина Баттсужга қарши дона суради.  

18 ёшгача бўлган шаҳматчилар мусобақасида қатнашаётган Баҳора Абдусатторова бу турда мўғулистонлик Ууртсайх Ууринттуядан енгилди. Бугун Баҳора россиялик Бибисара Ассаубаева билан муносабатларига ойдинлик киритиб олади. Ҳар икки шахматчи 5,5тадан очко жамғаришган.

Ва ниҳоят, 18 ёшли ўғил болалар мусобақасида ўз маҳоратини намойиш этаётган Адил Раҳмон 9-турда ғалаба қозонган ягона ҳамюртимиз бўлди. У қора доналарда ҳаракат қилишига қарамай, вьетнамлик Хоанг Ду Нгуэндан устун келди. Адел 5,5 очко билан 10-ўриндан жой олган.