Шахмат Олимпиадаси. 22-рақамли жамоамиз 22-ўринни эгаллади

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этди. Кеча мусобақада сўнгги 11-тур учрашувлари ўтказилди. Ўзбекистон аёллар терма жамоаси ҳар икки йилда бир маротаба ўтказиладиган нуфузли мусобақани ғалаба билан якунлади.

Словакия терма жамоасига қарши кечган баҳсда ҳамюртларимиз 3,5:0,5 ҳисобида зафар қучишди. Нафиса Мўминова биринчи доскада рақибаси Ева Репкова билан дуранг ўйнади. Қолган шахматчиларимиз Гулруҳбегим Тоҳиржонова, Ирина Геворнян ва Сарвиноз Қурбонбоевалар рақибаларини мағлуб этишнинг уддасидан чиқишди.

Таққослаш учун, шахмат Олимпиадасида Словакия 37, Ўзбекистон эса 22-рақамли жамоа сифатида қайд этилганди. Ушбу ғалабадан сўнг терма жамоамиз 31-поғонадан 22-ўринга кўтарилиб олди ва айнан шу натижа билан шахмат Олимпиадасини якунлади.

Терма жамоамиз 11та учрашувдан 6тасида зафар қучиб, 2та баҳсда дуранг ўйнаган ва уч бор мағлубият аламини тотиб кўрган. Хитой терма жамоаси Олимпиада чемпионига айланди. Польша кумуш, Украина эса бронза медалига сазовор бўлди.