Шахмат Олимпиадаси. Эркаклар жамоамиз 39-ўрин билан кифояланди

42-Бутунжаҳон шахмат Олимпиадасида 17-жаҳон чемпиони Рустам Қосимжонов бошчилигидаги Ўзбекистон эркаклар терма жамоаси нисбатан паст натижа кўрсатди. Олимпиаданинг сўнгги 11-турида шахматчиларимиз Беларусь терма жамоасига 1:3 ҳисобида имкониятни бой беришди.

Рустам Қосимжонов биринчи доскада қора доналарда ҳаракат қилиб, Сергей Жигалко билан дуранг ўйнади. Антон Филиппов Андрей Жигалко билан баҳсда муросага келди. Афсуски, Жаҳонгир Воҳидов ва Марат Жумаевлар рейтингда ўзларидан юқорида турувчи рақибларига ютқазиб қўйишди.

Таққослаш учун, Беларусь терма жамоаси Олимпиадада 23, Ўзбекистон терма жамоаси эса 31-рақам остида таснифланган эди. Якунда терма жамоамиз 39-поғона билан кифояланди. Ваҳоланки, сўнгги тур олдидан жамоамиз 23-ўринни эгаллаб турганди. Терма жамоамиз 6та ғалаба, битта дуранг ва 4та мағлубият билан Олимпиадани якунлади. АҚШ терма жамоаси Олимпиада чемпионига айланди.