Шахмат Олимпиадаси. Эркаклар жамоамиз Германияни мағлуб этди

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этяпти. Ўн еттинчи жаҳон чемпиони Рустам Қосимжонов бошчилигидаги Ўзбекистон эркаклар терма жамоаси Олимпиаданинг 10-турида кучли ҳисобланган Германия терма жамоасини 2,5:1,5 ҳисобида мағлуб этишнинг уддасидан чиқди.

Рустам Қосимжонов биринчи доскада Германиянинг биринчи рақамли гроссмейстери Ливиу-Дьетер Нисипияну билан дуранг ўйнади. Жаҳонгир Воҳидов рейтингда ўзидан юқорида турувчи Маттиас Блубаумга ютқазиб қўйди. Уларнинг бахтига Антон Филиппов ва Марат Жумаев ўзларидан анча кучли рақибларни мағлуб этиб, терма жамоамизга муҳим ғалабани келтиришди.

Таққослаш учун, Германия терма жамоаси Олимпиадада 13, Ўзбекистон терма жамоаси эса 31-рақам остида таснифланган. Бугун шахматчиларимиз 11-турда Беларусь терма жамоаси вакилларига қарши дона сураишади. Ўнинчи турдан сўнг терма жамоамиз қўшимча кўрсаткичларга кўра 36-поғонадан 23-ўринга кўтарилиб олди. Терма жамоамиз ҳисобида 6та ғалаба, битта дуранг ва 3та мағлубият бор.