Шахмат Олимпиадаси. Ўзбекистон - АҚШ, Ўзбекистон - Доминикан баҳси жуфтликлари маълум

Бугун Олимпиаданинг 4-тур партиялари ўйналади. Эркаклар ўртасидаги баҳсларда учта ғалабага эришиб, қўшимча коэфицентларга кўра 4-ўринни эгаллаб турган Ўзбекистон эркаклар терма жамоаси бугун рейтинг пешқадами АҚШ шахматчиларга қарши дона суради. Ўзбекистон жаҳон рейтингида 14-ўринни эгаллаб турибди. Бугунги жиддий рақибларимиз ҳам учта турда ғалаба нашидасини суришган. 

Бугун АҚШ сафида Фабиано Каруана, Левон Аронян, Уэсли Со, Сэм Шанкланд ёш гроссмейстерларимизга қарши дона суради. Рақибларнинг бари 2700 дан юқори рейтинг балларига эга эканиёқ АҚШнинг қандай жамоа эканидан дарак бериб турибди.  

Маълумот учун, АҚШ терма жамоаси 1-турда Анголани 3,5:1,5, 2-турда Парагвайни 2,5:1,5, кеча 3-турда Грузияни 3:1 ҳисобида мағлубиятга учратган эди. Юлдузли таркибга эга америкалик гроссмейстерлар қўшимча кўрсаткичга кўра 20-поғонадан жой олишган. 

(1) АҚШ - (14) Ўзбекистон (жуфтликлар):

Фабиано Карауна (2783) - Нодирбек Абдусатторов (2688)

Левон Аронян (2775) - Нодирбек Ёқуббоев (2620) 

Уэсли Со (2773) - Жавоҳир Синдаров (2629) 

Сэм Шанкланд (2720) - Жаҳонгир Воҳидов (2564) 

(Суратдаги Фабиано Каруана)

Икки ғалаба ва бир мағлубият қайд этган Ўзбекистон аёллар терма жамоаси шахматчилари эса бугун 4-турда доминиканлик дугоналарига қарши баҳс олиб боришади. Ўзбекистон жаҳон рейтингида 46, Доминикан Республикаси эса 75-поғонадан жой олган. Бугунги учрашув олдидан Ўзбекистон турнир жадвалида қўшимча кўрсаткичларга кўра 51, Доминикан эса 69-поғонани банд этган. 

(75) Доминикан Республикаси - (46) Ўзбекистон (жуфтликлар):

Рейдили Росарио (1882) - Нилуфар Ёқуббоева (2299) 

Уилсайда Сезар Диаз (1834) - Умида Омонова (2195) 

Дорибел Муньос (1851) - Мафтуна Бобомуродова (1914)

Мэри Пегуэро Гонсалез (1666) - Маржона Маликова (1756)