Шахмат Олимпиадаси. Қизларимиз Чехия терма жамоасини енгишди

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этяпти. Кеча мусобақада 9-тур учрашувлари ўтказилди. Ўзбекистон аёллар терма жамоаси мусобақадаги ўзининг бешинчи ғалабасини нишонлади.

Чехия терма жамоасига қарши кечган баҳсда ҳамюртларимиз 3:1 ҳисобида зафар қучишди. Нафиса Мўминова, Ирина Геворнян ва Сарвиноз Қурбонбоевалар рақибаларини мағлубиятга учратишди. Гулруҳбегим Тоҳиржонова эса оқ доналарда ўйнашига қарамай, Кристина Хавликовага ютқазиб қўйди. Ўзбекистон – Чехия - 3:1.

Таққослаш учун, шахмат Олимпиадасида Чехия 25, Ўзбекистон 22-рақамли жамоа сифатида қайд этилган. Кечаги ғалабадан сўнг терма жамоамиз 26-поғонадан 18-ўринга кўтарилиб олди.

Терма жамоамиз 9та учрашувдан 5тасида зафар қучиб, 2та дуранг ўйнаган ва икки бор мағлубият аламини тотиб кўрган. Бугун шахматчи қизларимиз дунёнинг йигирма биринчи рақамли жамоаси бўлиб турган Голландия терма жамоасидаги дугоналарига қарши дона суришади.