Шахмат Олимпиадаси. Қизларимиз Германия билан дуранг ўйнашди

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этяпти. Кеча мусобақада 7-тур учрашувлари ўтказилди. Ўзбекистон аёллар терма жамоаси кетма-кет иккита ғалабадан сўнг дуранг натижа қайд этди.  

Германия терма жамоасига қарши кечган баҳсда Нафиса Мўминова ва Сарвиноз Қурбонбоева ўзларидан рейтингда юқорида турган рақибаларини мағлубиятга учратишди. Ирина Геворгян ва Гулруҳбегим Тоҳиржонова эса аксинча имкониятни бой беришди.

Таққослаш учун, шахмат Олимпиадасида Германия 10, Ўзбекистон 22-рақамли жамоа сифатида қайд этилган. Ушбу дурангдан сўнг терма жамоамиз 16-ўринни эгаллаб турибди. Терма жамоамиз 7та учрашувдан 4тасида зафар қучиб, 2та дуранг ўйнаган ва бир бор мағлубиятга учраган. Бугун шахматчи қизларимиз дунёнинг бешинчи рақамли жамоаси бўлиб турган Ҳиндистон терма жамоасидаги дугоналарига қарши дона суришади.