Шахмат Олимпиадаси. Қизларимиз Словениядан устун келишди

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этяпти. Кеча мусобақада 6-тур учрашувлари ўтказилди. Ўзбекистон аёллар терма жамоаси кетма-кет иккинчи ғалабани тантана қилишди.

Бу сафар Словения терма жамоаси шахматчилари 2,5:1,5 ҳисобида мағлуб этилди. Нафиса Мўминова Лаура Унук билан дуранг ўйнади. Ирина Геворгян рақибасига ютқазиб қўйди. Унинг бахтига Гулруҳбегим Тоҳиржонова ва Сарвиноз Қурбонбоевалар ўз партияларида ғалабага эришиб, терма жамоамиз муҳим ғалабани тақдим этишди.  

Ушбу ғалабадан сўнг терма жамоамиз қўшимча кўрсаткичларга кўра 23-ўриндан 16-ўринга кўтарилиб олди. Ўнинчи ўриндаги Грузия терма жамоасида ҳам шунча очко бор. Терма жамоамиз 6та учрашувдан 4тасида зафар қучиб, биттадан дуранг ва мағлубият қайд этган. Бугун шахматчи қизларимиз ўзлари сингари очкога эга бўлиб турган Германия терма жамоасига қарши дона суришади.