Шахмат Олимпиадаси. Қизларимизнинг иккинчи мағлубияти

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этяпти. Кеча мусобақада 8-тур учрашувлари ўтказилди. Ўзбекистон аёллар терма жамоаси кеча мусобақадаги ўзининг иккинчи мағлубиятини қабул қилиб олишди.  

Ҳиндистон терма жамоасига қарши кечган баҳсда биргина Нафиса Мўминова мағлубиятга учради. Тажрибали Харика Дроноваллига қарши кечган баҳсда ҳинд шахматчиси зафар қучди. Сарвиноз Қурбонбоева, Гулруҳбегим Тоҳиржонова ва Нодира Нодиржоновалар эса кучли рақибалари билан муросага келишди. Ўзбекистон – Ҳиндистон - 1,5:2,5.

Таққослаш учун, шахмат Олимпиадасида Ҳиндистон 5, Ўзбекистон 22-рақамли жамоа сифатида қайд этилган. Кечаги мағлубиятдан сўнг терма жамоамиз 16-ўриндан 26-поғонага пастлади. Терма жамоамиз 8та учрашувдан 4тасида зафар қучиб, 2та дуранг ўйнаган ва икки бор мағлубият аламини тотиб кўрган. Бугун шахматчи қизларимиз дунёнинг ўн бешинчи рақамли жамоаси бўлиб турган Чехия терма жамоасидаги дугоналарига қарши дона суришади.