Шахмат. Қарши Опен-2018 халқаро турнири давом этмоқда

Турнирнинг халқаро гуруҳида 6-тур партиялари ўтказилди. Биринчи доскада Ўзбекистон вакиллари учрашиб, унда IM Нодирбек Ёқуббоев қора доналарда ўйнашига қарамай, ғалаба қозонди. 

Ўзбекистон чемпиони бўлган Нодирбек 6 имкониятдан 5 очко жамғариб, "А" гуруҳида пешқадамга айланиб олди. Ёқуббоевга имкониятни бой берган FM Акмал Файзуллаев 4,5 очкога эга.

Далер Воҳидовни (Ўзбекистон) мағлуб этган FM Абдумалик Абдусалимовда ҳам шунча очко бор. 

GM Виталий Сивук (Украина)дан устун келган GM Петр Костенко (Қозоғистон) ҳам очколарини 4,5тага етказиб олди. 

Финалга уч тур қолган бир пайтда яна 5 иштирокчи 4 очкога эга - улар гроссмейстерлар Хамицевич Владимир (Молдова), Жумаев Марат (Ўзбекистон), Йўлдошев Саидали (Ўзбекистон), Вуль Аркадий Е. (Россия) ва пойтахтлик халқаро мастер Воҳидов Шамсиддин.  

Аёл шахматчилардан энг яхши натижага халқаро гроссмейстер Сарвиноз Қурбонбоева эга бўлиб турибди. Ҳамюртимиз 6 имкониятдан 3,5 очко тўплади. 

"Б" гуруҳида мамлакатимизнинг турли вилоятларидан келган истеъдодли ёшлар дона суришяпти. Улардан уч нафари пешқадамлар сафидан жой олган. Ҳалимжонов Файзулло (2006 йилда туғилган), Жўраев Санжар (2002 йилда туғилган, иккиси ҳам Бухородан) ҳамда халқаро тажрибага эга самарқандлик шахматчи WCM Ҳамдамова Афруза 5та партиянинг барчасида ғалабага эришишди. 

Норалиев Сапарали (Сирдарё), Намозова Холида (Қашқадарё) ва Сулаймонов Мираббос (Бухоро) пешқадамлардан ярим очко кам жамғаришган. Яна 17 шахматчи 5 имкониятдан 4 очко тўплаган. Бу эса "Б" гуруҳида ҳам рақобат кучли эканлигини кўрсатиб турибди.