Шахмат: Халқаро турнирнинг 6-туридан кейинги вазият қандай?

Дунёнинг 12 давлатидан 150 нафар ақл-идрок соҳиблари қатнашаётган мусобақанинг “А” гуруҳида ҳамон етакчилар ўша-ўша, 4 нафарни ташкил этиб турибди. Фақат пешқадамлар квартетида эронлик Ариан Голами ўрнини ҳамюртимиз Нодирбек Ёқуббоев эгаллади, яъни етакчилар сафидан икки нафар ўзбекистонлик ва икки нафар Арманистон вакиллари жой олишган.

Турнирнинг 1-тартиб рақамли иштирокчиси Нодирбек Абдусатторов дастлабки 4 турда юз фоизлик натижа қайд этган бўлса-да, 5 ва 6-партияларда кучли рақиблари билан муросага эришди. Аввалига арманистонлик Шант Саргисян, кейин эса жамоадоши ва адаши Нодирбек Ёқуббоевлар билан дуранг қайд этди.

6-турдан сўнг энди ўзбекистонлик ёш гроссмейстерлар Н.Абдусатторов ҳамда Н.Ёқуббоев, шунингдек Арманистон терма жамоаси аъзолари Ш.Саргисян ва Тигран Арутунянлар бир хил – 5 тадан очко жамғаришган ҳолда етакчилик қилишмоқда.

5-ўриндан 4,5 очко билан яна бир арманистонлик гроссмейстер Мануел Петросян жой олган. Ундан кейинги поғоналарни 4 очкодан жамғарган бирйўла 14 нафар шахматчи банд этган. Эътиборлиси, улардан 6 нафари Ўзбекистон вакилларидир.