Шахмат: Йигитларимизда йирик ғалаба, қизларимиз эса...

Бугун мусобақанинг иккинчи тур баҳслари бўлиб ўтди. 

Эркаклар терма жамоамизга иккинчи турда Фарер Ороллари вакиллари рақиблик қилишди. Мазкур қарама-қаршиликда Нодирбек Абдусатторов, Нодирбек Якуббоев, Жавоҳир Синдоров, Жавоҳир Воҳидов каби гроссмейстерларимиз дона суришди ва уларнинг барчаси ғалабага эришди - 4:0!

Қизларимизга эса етакчи АҚШ терма жамоаси вакилалари рўбарў келдилар. Нилуфар Якуббоева, Умида Омонова, Афрўза Ҳамдамова ва Маржона Маликовадан ташкил топган таркибимиз афсуски 1:3 ҳисобида имкониятни бой бериб қўйди. Қизларимиз сафида ягона ғалабани Умида Омонова қўлга киритди. У ўзидан анча тажрибали бўлган рақибаси Йип Кариссаникидан устун келди. 

Эслатиб ўтамиз, АҚШ сафида ўзбекистонлик Гулруҳбегим Тоҳиржонова ҳам дона суради. Аммо, у Ўзбекистон терма жамоасига қарши ўйинда иштирок этмади.