Шахматчиларимиз Aktobe Open 2024 турнирининг 8-турида қандай натижа қайд этишди?

Мукофот жамғармаси 100 000 АҚШ долларини ташкил этувчи Aktobe Open 2024 турнири анъанавий тарзда Владимир Дворкович хотирасига бағишлаб ўтказиб келиняпти. Дунёнинг кўзга кўринган гроссмейстерлари қаторида уч нафар шахматчимиз Нодирбек Якуббоев (2665), Муҳаммадзоҳид Суяров (2429) ва Муҳиддин Мадаминов (2504) ҳам совринли ўринлар учун дона суришаётганди.

Афсуски, улардан Муҳиддин Мадаминов мусобақа якунналишига уч тур қолган бир пайтда иштирокини якунлаб бўлди. Турнирнинг 8-турида қолган икки вакилимиз оқ доналарда ҳаракат қилишди. Якуббоев кутилмаганда беларуслик Михаил Никитенко (2525)га имкониятни бой бериб қўйди. Суяров эса аксинча, қозоғистонлик Сауат Нургалиев (2320)ни мағлубиятга учратди. 

Бугун ўтказиладиган сўнгги 9-тур олдидан Парҳам Мақсудлу (Эрон, 2732) 7 очко билан якка карвонбоши бўлиб турибди. У 8-турда ҳинд гроссмейстери Пураник Абҳиманюни мағлубиятга учратиб, пешқадамлигини мустаҳкамлаб олди. Алексей Сарана (Сербия, 2706), Абҳижит Гупта (Ҳиндистон, 2601), Шант Саргсян (Арманистон, 2637), Александр Предке (Сербия, 2667) ҳамда Якуббоевдан устун келган Михаил Никитенко (Беларусь, 2525) 6 тадан очко жамғариб, кейинги ўринларни банд этишган. Беш очкога эга Нодирбек Якуббоев эса қўшимча кўрсаткичларга кўра 16-ўринга тушиб кетди ва совринли ўринларни эгаллай олмаслиги 100 фоиз ойдинлашди. 

Муҳаммадзоҳид Суяров 8-турдан кейин 4,5 очко билан 41-поғонадан 28-ўринга кўтарилиб олди. Муҳиддин Мадаминов эса мусобақадаги иштирокини 2,5 очко билан якунлаб бўлди. У ҳозир жадвалда 74-поғонадан жой олган. Бугун сўнгги 9-турда шахматчиларимиз қора доналарда ҳаракат қилишади. 

Aktobe Open 2024. Сўнгги 9-тур жуфтликлари

Сапармират Атабаев (Туркманистон, 2514) - Нодирбек Якуббоев (2665) 

Александр Раҳманов (FIDE, 2614) - Муҳаммадзоҳид Суяров (2429)

Маълумот учун, Aktobe Open 2024 турнири ғолиби 20 000 доллар мукофот пулига эга бўлади. Иккинчи ўрин соҳиби 15 600, учинчи ўрин эгаси эса 11 100 АҚШ долларини қўлга киритади.