Шахматчиларимиз Бразилияда чемпионлик учун курашмоқда

16 ёшгача бўлган қизлар ўртасида Ватанимиз шарафини ҳимоя қилаётган Афрўза Ҳамдамова оқ доналарда мексикалик Гваделупе Мантано Висенте билан ўйин ўтказди. Қизиқарли кечган учрашувнинг 67-юриш ҳолатида томонлар муроса йўлини танлашга мажбур бўлди. Ушбу натижадан кейин Ҳамдамова 2,5 очко билан кучли бешликдан жой олишга эришди.

Ушбу турда терма жамоамиз аъзоларидан Жавоҳир Бозоров 14 ёшгача бўлган ўғил болалар мусобақасида оқ доналарда Жанубий Африка вакили Калеб Дейсел билан баҳс олиб борди ва ишончли тарзда ғалабага эришди.

14 ёшгача бўлган қизлар ўртасидаги баҳсда канадалик Анаис Хлоя Фисел билан беллашган Нилуфар Имомқўзиева қора доналарда ҳаракатланишига қарамасдан муваффақиятга эришди.

Жаҳон чемпионатининг 4-турида Афрўза Ҳамдамова қора доналарда парагвайлик Майерггер Гонсалес билан, Жавоҳир Бозоров германиялик Даниэл Нуньес Грегур билан, Нилуфар Имомқўзиева арманистонлик Сона Кркьяшарян билан куч синашади.

Чемпионатнинг 4-тур ўйинлари олдидан Жавоҳир Бозоров ўз ёш тоифасида 2 очкога эга бўлиб турибди. Ушбу ёш тоифасида  118 нафар ёш шахматчи қатнашаётган бўлса, уларнинг 6 нафари 3, 11 нафари 2,5 ва 42 нафари 2 очко жамғаришга муваффақ бўлган.  

14 ёшгача бўлган қизлар орасида эса терма жамоамиз аъзоси Нилуфар Имомқўзиеванинг кучлилар қаторидан ўрин олиш учун кўрсаткичлари бир мунча эътиборли. У ҳозирда 2,5 очкога эга. Ушбу гуруҳда 7 нафари 3, 8 нафари 2,5 очко билан ғолиблик йўлидаги курашни давом эттирмоқда.

Эслатиб ўтамиз, 11 турдан иборат жаҳон чемпионати баҳслари 10 ноябрга қадар давом этади