26 июл 10:47
Янгиликлар

Шахмат

Шахматчиларимиз Осиё Миллатлар Кубогига йўл олишди ФОТО

Бугун шахмат бўйича Ўзбекистон терма жамоаси (эркаклар ва аёллар) делегацияси Осиё Миллатлар Кубоги-2018 мусобақасида иштирок этиш учун жўнаб кетди.

Таркибда 17-жаҳон чемпиони Рустам Қосимжонов йўқ. Ушбу нуфузли Asian Nations Chess Cup 2018 мусобақаси Эроннинг Ҳамадон шаҳридж 27 июль - 4 август кунлари оралиғида бўлиб ўтади. Терма жамоалар ўртасидаги турнир стандарт шахмат, рапид ва блиц йўналишларида ўтказилади.

Ўзбекистан эркаклар терма жамоаси:

GM Сайдали Йўлдошев (2456, жамоа сардори)

IM Нодирбек Ёқуббоев (2512)

IM Жавоҳир Синдаров (2474)

IM Никита Хорошев (2424)

IM Абдумалик Аблисалимов (2331)

Ўзбекистон аёллар терма жамоаси:

WIM Ирина Геворгян (2254, жамоа сардори)

WGM Гулруҳбегим Тоҳиржонова (2350)

WGM Сарвиноз Қурбонбоева (2241)

WIM Нодира Нодиржонова (2180)

WIM Севара Боймуродова (2099)

Маълумот учун, Эрон мамлакати ушбу мусобақани учинчи маротаба қабул қилмоқда. Осиё Миллатлар Кубогига 2006 йили Исфахон, 2014 йилда эса Табриз шаҳри мезбонлик қилганди.

Эркаклар ўртасидаги мусобақада 13та терма жамоа иштирок этади: Ҳиндистон (рейтинг-фаворити, жамоанинг ўртача рейтинги 2662), Хитой (2609), Эрон Грин (2593), Қозоғистон (2536), Вьетнам (2517), Эрон Ред (2508), Ўзбекистон (2467, еттинчи рақам остида таснифланди), Эрон Вайт (2429), Бангладеш (2338), Ироқ (2277), Сурия (2211), Уммон (2059) ва Афғонистон (1435).

Осиё Миллатлар Кубогида 30 нафар халқаро гроссмейстер, уларнинг 10 нафари рейтинг бўйича 2600дан юқори, 12 халқаро тоифадаги спорт усталари иштирок этаётгани мусобақанинг нуфузидан дарак бериб турибди.

Аёллар ўртасидаги мусобақада эса 8та терма жамоа иштирок этади: Хитой (жамоанинг ўртача рейтинги - 2418), Қозоғистон (2404), Ҳиндистон (2390), Вьетнам (2295), Эрон Грин (2270), Ўзбекистон (2256), Эрон Ред (2035) ва Сурия (1185). Икки халқаро гроссмейстер Харика Дроновалли (Ҳиндистон) ва Лей Тинг Жиэ (Хитой) мусобақа фаворитлари сифатида эътироф этилмоқда.

Эслатиб ўтамиз, 2016 йилнинг 28 март - 7 апрель кунлари оралиғида БААнинг Абу-Даби шаҳрида бўлиб ўтган Осиё Миллатлар Кубогида Ўзбекистон аёллар терма жамоаси стандарт шахмат ва рапид бўйича кумуш медалларни қўлга киритган эди.