Шахматчимиз Шаржадаги турнирда совриндор бўлди

Ўз тарихида 23-бор ташкил этилган мусобақа шахматнинг тезкор ҳамда блиц йўналишларида ўтказилди. Халқаро турнирда ўзбекистонлик ёш шахматчилардан - амалдаги Ўзбекистон чемпиони, халқаро тоифадаги спорт устаси Нодирбек Ёқуббоев, шунингдек, Абдумалик Абдусалимов ва Суҳроб Комилжонов иштирок этди. 

Мусобақанинг тезкор шахмат баҳслари швейцарча тизимда ўтказилиб, ғолиб ва совриндорлар 9 тур натижасига кўра аниқланди. Унда 7,5тадан очко жамғарган халқаро гроссмейстерлар - грециялик Эфстратиос Гривас ҳамда кубалик Аренсибиа Родригес биринчи ва иккинчи ўринларни бўлишиб олишди. 

Бир йўла тўрт нафар иштирокчи 7тадан очко тўплади. Улар орасида энг яхши қўшимча кўрсаткичга эга бўлган ҳамюртимиз Нодирбек Ёқуббоев бронза медалини қўлга киритди. Шунингдек, Ёқуббоев 16 ёшгача бўлган тенгқурлари орасида биринчи ўринга сазовор бўлди. ФИДЕ устаси Абдумалик Абдусалимов 16 ёшгача шахматчилар орасида иккинчи, умумий ҳисобда 7 очко билан 6-ўринни банд этди. 

Халқаро турнирнинг рапид баҳсларида эса бу икки шахматчимиз кучли ўнликдан жой олишди. Ёқуббоев 9 имкониятдан 7, Абдусалимов эса 6,5 очко билан 10-ўринни эгаллади. Эътиборлиси, Абдумалик ёш бўлишига қарамай халқаро гроссмейстерлар Константин Ланд ва Дмитрий Комаровларни мағлуб этишнинг уддасидан чиқди.