Шерзод Ташматов МОҚ раиси ўринбосари этиб сайланди + ФОТО

Йиғилиш давомида бир қатор масалалар кўриб чиқилди. 

Унга кўра, бундан буён МОҚ президенти МОҚ раиси, вице-президентлар раис ўринбосари сифатида қайд этилади. 

Бундан ташқари йиғилиш давомида қилинган ишлар таҳлил қилинди, олдинда Токио 2020 Олимпиадаси учун бажарилиши лозим бўлган вазифалар белгиланди. 

Шундан сўнг ташкилот раисига янги ўринбосар сайлаш учун Шерзод Ташматов номзоди илгари сурилди. Делегатлар бир овоздан кўрсатилган номзодни қўллаб-қувватлашди. Шу тариқа, Шерзод Рихсибаевич Ташматов МОҚ раиси ўринбосари этиб сайланди. 

Маълумот учун, Шерзод Ташматов узоқ йиллардан буён спорт соҳаси ривожига ўз ҳиссасини қўшиб келмоқда. У киши ўз вақтида Ўзбекистон бокс федерацияси биринчи вице-президенти сифатида ҳам кўплаб ютуқларга эришган. Ҳусусан, Рио Олимпиадасида боксчиларимизнинг муваффақияти ҳам ушбу инсон билан боғлиқ. Ўшанда чарм қўлқоп усталари Олимпиадада 7 та медалга эга чиққандилар. Шундан сўнг Осиё чемпионати, Осиё ўйинларида ҳам боксчиларимиз муваффақият қозонишган.

Ш. Ташматов бугунги кунда Ўзбекистон таэквондо WT ассоциациясидан ташқари, Ўзбекистон ММА ассоциациясида ҳам раис ўринбосари сифатида фаолият юритмоқда.