Шоҳида ва Набира Осиё чемпионати 1/2 финалида. Есенбаеванинг рақибаси Олимпиада кумуш медали совриндори!

Бугун мусобақанинг тўртинчи куни аёллар кураши баҳсларининг қолган 5 та вазн тоифасида ғолиб ва совриндорлар номи маълум бўлади. Бугун беллашувларга киришган 5 курашчимиздан 2 нафари ярим финалга етиб келди.

Ўсмирлар Олимпиадаси совриндори Шоҳида Аҳмедова биринчи даврада ҳиндистонлик Аншу Аншуга имкониятни бой бериб қўйди. Иккинчи босқичда эса Даниелле Лим (Сингапур) устидан 10-0 ҳисобидаги ишончли ғалабага эришиб, ярим финалга йўл олди. -57 кг вазнда юртимиз шарафини ҳимоя қилаётган Шоҳиданинг финал чиптаси учун кечадиган баҳсдаги рақибаси Тсугуми Сакураи (Япония) бўлади.

-62 кг вазн тоифасидаги вакиламиз Набира Есенбаева ўз иштирокини 1/4 финалдан бошлади. У бу босқичда Сачини Верадуваге (Шри-Ланка)дан 4-0 ҳисобида устун келди. Бироздан сўнг Есенбаева 1/2 финалда Токио Олимпиадасининг кумуш медали совриндори, икки карра жаҳон чемпиони, қирғизистонлик Айсулуу Тинибековага қарши гиламга чиқади.