Шоҳжаҳон Эргашевни судга беришди

Бунга спортчи шартнома шартларини бажармагани сабаб бўлган. Мичиган штатининг шарқий округи Федерал судига келиб тушган аризага кўра, Нью-Йоркда рўйхатга олинган Salita Promotions боксчи билан 2017 йилдан бошланган 5 йиллик эксклюзив алоқага эга. Шартноманинг бир бандида тўғридан-тўғри шундай ёзиб қўйилган: яъни унга кўра, боксчи компания бевосита промоутер бўлмаган жангларда иштирок этмасликка розилик билдирган. 

Шунингдек, промоутерлик компанияси Эргашев ушбу келишувни бузган тақдирда, суд орқали бу каби қоидабузарликлар такрорланмаслигини ва 75 минг доллар талаб қилишга ҳақли. 

Salita Promotions аризаси 21 сентябрь куни Санкт-Петербургда Эргашев ва Димитрий Милюша ўртасида бўлиши режалаштирилган жанг билан боғлиқ. 

Эргашевга тўрт пункт бўйича шикоят тушган, шу ўринда Богдановга ҳам эътирозлар мавжуд. Компания Америка судидан боксчи шартномада кўрсатилган тартибда келишилмаган бошқа исталган жангларда иштирок этишини чеклаб қўйишни ва боксчи менежерига "Salita Promotions"ни хабардор қилмай жанглар ташкиллаштира олмаслигини эслатишни сўраган.

Аввалроқ, Эргашев Olamsport.com сайтига берган интервьюсида ушбу жанг трансляция билан боғлиқ муаммолар сабаб амалга ошмаслигини айтганди.