Скандинавча юриш бўйича “Юр, Тошкент” марафони ўтказилди

Мазкур тадбир пойтахтимиз аҳолиси ўртасида жисмоний тарбия ва спортни оммалаштириш, соғлом турмуш тарзини тарғиб қилиш мақсадида Тошкент шаҳар жисмоний тарбия ва спорт бошқармаси томонидан ўтказилаётган “Сафимизга қўшилинг” акцияси доирасида бўлиб ўтди.

Бундан ташқари, Соғлиқни сақлаш бошқармаси билан ҳамкорликда пойтахтимизнинг Мирзо Улуғбек туманида жойлашган “Central park” боғида оммавий гимнастика ва 5 километрга фаол юриш машқлари бўйича оилавий мусобақалар ҳам уюштирилди.

— Пойтахтимиздаги барча болалар-ўсмирлар спорт мактаблари қошида 55 ёшдан юқори бўлган аёллар учун “Ҳаваскор аёллар спорт клуби” ташкил этилди. Бугун ўтказилган тадбирлар ҳам ушбу клуб аъзолари сонини янада ошириш мақсадида ўтказилди, - дея Тошкент шаҳар жисмоний тарбия ва спорт бошқармаси бошлиғи Анвар Мурсақулов юқоридаги тадбирларнинг аҳамияти ҳақида гапириб ўтди.

Ушбу тадбирлар аёллар саломатлигини сақлашда муҳим аҳамиятга эга. Мамлакатимизда аёлларнинг саломатлигига муҳим масала сифатида қаралади. Зеро, соғлом онадан соғлом бола дунёга келади. Баркамол авлодни тарбиялаш мамлакат истиқболини таъминлаш демакдир.