Слот келаси мавсум ҳам "Ливерпуль"ни бошқариши мумкин экан

"Sky Sports" нашрининг хабарига кўра, 47 ёшли нидерландиялик мутахассис жамоани ЕЧЛга олиб чиқса, ўз ўрнида қолади.

Келаси мавсумда Англиядан камида бешта жамоа Чемпионлар Лигасида иштирок этади. Айни дамда "қизиллар" АПЛ турнир жадвалида 5-ўринни эгаллаб туришибди ва мавсум тугашига бешта тур қолганда 6-ўриндаги "Челси"дан 7 очко олдинда бормоқда.

Ўтган мавсумда "Ливерпуль"ни АПЛ чемпионлигига етаклаган Слот учун бу йилги мавсум оғир кечди. Жамоа чемпионлик пойгасида "Арсенал" ва "Манчестер Сити"дан анча орқада қолди ва сўнгги беш йил ичида илк бор мавсумни совринсиз якунлайдиган бўлди.

Шунга қарамай, клуб раҳбарияти мураббийни қўллаб-қувватлашда давом этади. Ёзда жамоа таркибини сезиларли даражада кучайтириш режалаштирилган. Айниқса, жамоа етакчиси Муҳаммад Салоҳ кетганидан сўнг ҳужум чизиғини қайта шакллантириш устувор вазифа этиб белгиланган.