Соғлом турмуш тарзи сари илк қадам болаликдан қўйилади

Хусусан, 2020 йил 30 октябрдаги «Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида»ги Президент фармони бу борада муҳим қадам бўлди.

Фармонга мувофиқ, мактабгача таълим, умумий ўрта, ўрта махсус, олий ўқув юртлари ҳамда бошқа ташкилотларда жисмоний тарбия ва оммавий спорт билан шуғулланиш учун етарли шарт-шароитлар яратиш алоҳида белгилаб қўйилган.

Мазкур фармон асосида илк марта Ўзбекистон велосипед спорти федерацияси ташаббуси билан Жисмоний тарбия ва спорт вазирлиги, Мактабгача таълим вазирлиги ҳамда Европада хавфсизлик ва ҳамкорлик ташкилоти (ЕХҲТ) ҳамкорлигида мактабгача таълим муассасалари тарбияланувчилари, яъни жажжи болакайларнинг спорт билан шуғулланишлари учун замонавий Беговеллар (болалар учун педалсиз велосипедлар) билан таъминлаш, «Ўзбекистонда биринчи болалар велопойгаси»ни ўтказиш бўйича Меморандум имзоланди.

Тадбирда Ўзбекистон Республикаси Олий Мажлиси Сенати раиси, мамлакат велосипед спорти федерацияси раиси Танзила Норбоева, Жисмоний тарбия ва спорт вазири Дилмурод Набиев, Мактабгача таълим вазири Агриппина Шин ҳамда ЕХҲТнинг мамлакатимиздаги доимий координатори, жаноб Жон Макгрегорлар иштирок этишди.

Расмийлар янги ташаббуснинг мамлакатимизда оммавий спорт тарғиботи йўлида қанчалик муҳим аҳамият касб этиши ҳақида илиқ фикрлар билдиришди. Шундан сўнг ташкилотлар ўртасида ўзаро ҳамкорлик меморандуми имзоланди.

Меморандумдан кўзланган асосий мақсад – ёш болаларни жисмоний тарбия ва оммавий спорт билан шуғулланишга шарт-шароит яратишни кенг йўлга қўйган ҳолда республикамизнинг барча ҳудудларидаги мактабгача таълим муассасаларини босқичма-босқич Беговеллар билан таъминлаш, томонлар ўртасида ўзаро самарали ҳамкорликни кенгайтириш ва мустаҳкамлаш учун замин яратиш, бугунги кунда юртимизда жисмоний тарбия ва спорт соҳасини жадал ривожлантириш юзасидан тизимли ишлар амалга оширишдан иборат.