Chess Classic Romania 2026. Синдаровда кетма-кет иккинчи ғалаба. Бугун чемпионлик учун партиялар!

Мусобақада юқори рейтингга эга ўн нафар гроссмейстер бош соврин учун кураш олиб боряпти. Улар орасида "Номзодлар турнири" ғолиби Жавоҳир Синдаров ҳам бор. Ҳамюртимиз 8-турда қора доналарда ўйнаганига қарамай, мусобақа пешқадамларидан нидерландиялик Йорден ван Форестни мағлуб этишга муваффақ бўлди. Кетма-кет икки ғалаба шахматчимизни чемпионлик пойгасига қўшилишига хизмат қилди.  

Руминиялик Богдан-Даниэль Дик нидерландиялик Аниш Гирини таслим этди. Саккизинчи турнинг қолган партиялари дуранг натижа билан якунланди. Ҳиндистонлик Рамешбабу Праггнанандҳа франциялик Максим Вашье-Лаграв, германиялик Винсент Кеймер америкалик Фабиано Каруана билан муросага кеди. Мусобақадан чиқиб кетган франциялик Алиреза Фирузджанинг рақиби америкалик Уэсли Сога техник ғалаба ёзилди. 

Сўнгги тур олдидан Фабиано Каруана ва Винсент Кеймер 5 очкодан жамғариб, турнир жадвалида қўшҳокимлик қиляпти. Кечаги ғалабаси эвазига Жавоҳир Синдаров очколарини 4,5 тага етказиб олди ва қўшимча кўрсаткичларга кўра учинчи ўринга кўтарилди. Жавоҳирнинг бугунги рақиби Уэсли Со, шунингдек, Йорден ван Форест ҳисобида ҳам 4,5 очкодан бор. 

Бугун сўнгги 9-турда Жавоҳир Синдаров оқ доналарда америкалик Уэсли Сога қарши баҳс олиб боради. Агар бугун ҳам ҳамюртимиз ғалаба қозонса, у ҳолда аниқ совринли ўринлардан бирини эгаллайди. Учрашувлар бизнинг вақт билан соат 18:00да бошланади. Чемпион 100 000 долларни қўлга киритади.