Спорт мактабалари оммавийлик ва баркамолликка хизмат қилади

Бу борада юртимизда фаолият юритаётган спорт мактабларининг мураббийларига яна ҳам катта масъулият юкланади. 

Хусусан, бугун биз сўз юритмоқчи бўлганимиз - Тошкент вилояти Спортни ривожлантириш бош бошқармаси тасарруфидаги Чирчиқ шаҳар спорт мактабида ҳам 2301 нафар ўғил-қизлар дзюдо, бокс, юнон-рум кураши, қиличбозлик, баскетбол, волейбол, футбол, бадиий ва спорт гимнастикаси, таэквондо, велоспорт (МТБ), стол тенниси, оғир атлетика, енгил атлетика, қояни забт этиш, велоспорт (шоссе), турон якка кураши, кураш, белбоғли кураш, шахмат, самбо, бел олиш ва уч кураш, каратэ (ВКФ), пара қиличбозлик ва пара шахмат спорт турлари бўйича 81 нафар малакали тренерлар қўл остида мунтазам машғулотларга киришган.

Машғулотларга зўр бераётган спортчи-ўқувчиларнинг мусобақалардаги натижаларини ҳам эътирофга сазовор дейиш мумкин. Миравоз Мирсадиков, Мунир Айтматов, Лайло Давлетярова (енгил атлетика), Саидбек Жеенбаев (қиличбозлик), Шаҳзода Шермуҳаммедова (шахмат), Акмал Жуманиёзов (қояни забт этиш), Иқбол Исаев (белбоғли кураш), Абдурауф Якубов (юнон-рум кураши), Абдулазиз Очилов (турон якка кураши), Хуршид Нурбоев (бокс), Абдулла Абдуқаюмов (каратэ ВКФ) сингари тренерлар қўл остида шуғулланиб келаётган ўғил-қизлар республика ва халқаро мусобақаларда ёрқин ғалабаларга эга чиқаётгани бор гап.

Кўпчилик спорт мутахассисларига яхши маълум, Чирчиқ спорт мактаби тарбияланувчилари аввалдан вилоят ва республика мусобақаларида ҳамиша кучли учталикда қайд этилади. Бу анъанани давом эттириш учун спорт мактаби раҳбарияти ва тренерлари бор билим ва тажрибаларини ишга солишяпти.

Шунингдек, спорт мактаби директори Суҳроб Султонов бошчилигида устоз-мураббийлар Чирчиқ шаҳрининг барча маҳаллалари кесимида “Беш ташаббус” олимпиадаси доирасидаги оммавий спорт мусобақаларини юқори савияда ўтишида ҳам кўмакчи бўлишмоқда.

Спорт мактаби тарбияланувчиларининг ўзлари танлаган спорт турига қизиқишини ошириш, спортда юқори чўққиларни забт этишда мустаҳкам иродани шакллантириш мақсадида номдор спортчилар иштирокида маҳорат дарсларини ўтказиш одат тусини олган.

Жумладан, яқинда ёш таэквондочилар учун халқаро тоифадаги спорт устаси, кўп карра халқаро мусобақалар ғолиби, “Токио-2020” иштирокчиси, “Конья-2021” Ислом бирдамлиги ўйинлари олтин медали соҳибаси Светлана Осипова маҳорат дарсларини ўтказди.

Профессионал спортчиларнинг бу каби маҳорат сабоқларини спорт мактаби билан ҳамкорликда амалга ошириши анъанага айланган.

Бир сўз билан айтганда, мамлакатимиздаги барча спорт таълим муассасаларидаги каби Чирчиқ спорт мактабининг спортчи ўғил-қизлари ҳам бугун муносиб шарт-шароитлардан оқилона фойдалиниб, устозлари этагидан маҳкам тутиб, ўз саломатликларини янада мустаҳкамлаш ва маҳоратларини ошириб, чемпионлик сари қадам ташлаётгани айни ҳақиқат.  

Илҳом РАҲМОНОВ тайёрлади