Спорт оиласининг тўрт нафар вакили байрам арафасида "Зулфия" мукофотини қўлга киритди

Мамлакатимизда хотин-қизларни эъзозлаш, уларнинг жамиятдаги ўрни ва нуфузини ошириш, орзу-интилишларини қўллаб-қувватлаш, ўзининг иқтидори ва ибратли фаолияти билан ёшларга ўрнак бўлаётган, турли соҳа ва тармоқларда қобилият ва имкониятларини рўёбга чиқараётган, Учинчи Ренессанс пойдеворини яратишда чуқур билим ва интеллектуал салоҳиятини намоён этиб, ўз ғоя ва ташаббусларини илгари сураётган, ижтимоий ҳаётда фаоллик кўрсатаётган қизларни муносиб рағбатлантириш мақсадида Зулфия номидаги Давлат мукофоти билан тақдирлаш тўғрисидаги Президент қарори эълон қилинди.

Унга кўра, жами 28 нафар юртдошимиз аъло хулқи, ноёб истеъдоди, зукколиги, ташаббускорлиги, ўқишдаги муваффақиятлари ҳамда таълим, фан, адабиёт, санъат, спорт соҳаларида ва жамоатчилик фаолиятида эришган алоҳида ютуқлари учун Зулфия номидаги Давлат мукофотига сазовор бўлишди.

Эътиборлиси, мукофотланганларнинг тўрт нафарини спорт соҳасида ўзларини намоён этиб келаётган қизларимиз ташкил этишади. Булар:

Оразбаева Гулсанем Жалғасбай қизи – Қорақалпоғистон Республикаси Бўзатов туманидаги 1-умумий ўрта таълим мактабининг 8-синф ўқувчиси, шотокан каратэ-до бўйича Ўзбекистон кубоги ғолиби, спорт усталигига номзод;

Салимова Амира Суннатжон қизи – Бухоро вилояти Когон шаҳридаги 8-умумий ўрта таълим мактабининг 11-синф ўқувчиси, бадиий гимнастика бўйича Ўзбекистон миллий терма жамоаси аъзоси;

Омонова Умида Шуҳрат қизи – Ўзбекистон шахмат федерациясининг Халқаро шахмат академияси ўқувчиси, ФИДЕ устаси (Сурхондарё вилояти);

Ким Юлия Олеговна – Республика олий спорт маҳорати мактабининг фигурали учиш бўйича мураббийи, спорт устаси (Тошкент шаҳри).

Биз ушбу юксак давлат мукофотига сазовор бўлган барча қизларни муборакбод этамиз ҳамда келгуси фаолиятларида омад ва зафарлар ёр бўлишини тилаймиз.