Спорт таълим муассасаларидаги қишки аттестация натижадорликка хизмат қилади

Жорий йилнинг 22-27 январь кунлари мамлакатимиздаги мавжуд 15 та Олимпия ва паралимпия спорт турларига тайёрлаш марказларида, олимпия ва миллий спорт турлари бўйича давлат ихтисослаштирилган мактаб-интернатларида, бокс бўйича Баҳодир Жалолов ва гимнастика бўйича Оксана Чусовитина спорт маҳорати мактаби ҳамда Денов ва Урганч дзюдо спорт маҳорати мактабларида таҳсил олаётган ўқувчи-спортчилар қишки аттестациядан ўтказилмоқда.

Хусусан, Ўзбекистон Республикаси Спорт вазири ўринбосари Ш.Маҳмудов қишки аттестация жараёнларининг шаффоф ва адолатли ўтишини кўздан кечириш, спортчи ва мураббийлар, мутахассислар билан тўғридан тўғри мулоқот ўтказиш, давлатимиз томонидан яратиб берилган шарт-шароитлардан самарали фойдаланиш ҳолатлари билан танишиш мақсадида Қашқадарё вилоятига хизмат сафари уюштирди.

Айтиш лозим, мамлакатимиз спорт шарафини нуфузли халқаро мусобақаларда муносиб ҳимоя қилишда миллий терма жамоаларга иқтидорли ёшларни етиштириб бераётган Олимпия ва паралимпия спорт турларига тайёрлаш марказлари ҳамда жойлардаги ихтисослаштирилган спорт мактаб-интернатларининг улуши катта.

Ўтган йили давлатимиз раҳбарининг кўрсатмаси асосида профессионал спортчилар захирасини янада кучайтириш мақсадида Олимпия ва паралимпия спорт турларига тайёрлаш марказлари ҳамда ихтисослаштирилган спорт мактаблари фаолияти янги тизим асосида йўлга қўйилди.

Бундан икки йил муқаддам Олимпия ва паралимпия спорт турларига тайёрлаш марказларидаги 9 мингга яқин спортчиларнинг 21 фоизи миллий терма жамоалардан жой олган бўлса, жорий этилган янги тизим асосида Олимпия ва паралимпия спорт турларига тайёрлаш марказлари ўқувчилари контингенти 2023 йилда 150 нафарга қисқартирилиб, 450 нафарга туширилди. Натижада ушбу спорт таълим масканларида шуғулланаётган 6,9 минг нафар спортчиларнинг 30 фоизи спорт турлари бўйича миллий терма жамоаларда ўз ўрнини топди.

Хўш, бу йилги ҳолат қандай кўринишни олади? Маҳоратли спортчиларни тайёрлаш тизимида жорий этилган янги монтироинг тизими ютуқларга хизмат қилмоқдами? 

Бошланган қишки аттестация синовлари ва кўрсаткичлари айни саволларга қисман жавоб бериши билан маҳоратли спортчиларни танлашга хизмат қилиши билан аҳамиятлидир.

Аттестация спорт-талим муассасиларида ўқувчи-спортчиларнинг спорт тайёргарлик даражаси ўсиб боришини, спорт мусобақаларида эришган натижаларини таҳлил қилиш, ўқув режанинг ўзлаштириш ҳолати, жамоатчилик ишларида қатнашганлик даражасини аниқлаш билан бирга келгусида миллий терма жамоаларга иқтидорли спортчиларни танлаш, саралаш ва йўналтириш тизимларини яхшилашга ҳам хизмат қилади.

Мамлакатимизда давлатимиз раҳбари Шавкат Мирзиёев томонидан спорт таълимига алоҳида эътиболр берилаётган бир пайтда белгиланган режа асосида Спорт вазирлиги мутахассислари, тажрибали спорт мутахассислари томонидан қабул қилинаётган аттестация жараёнлари Янги Ўзбекистоннинг янги ғалабаларини таъминлашга қодир “олтин авлод” вакилларининг бўй кўрсматишига олиб келиши шубҳасиздир.

Спорт вазир ўринбосари Шахрулло Маҳмудовнинг Қашқадарё вилоятига хизмат сафари давомида вилоятда фаолият олиб бораётган спорт таълим муассасаларидаги аттестация жараёнларида бевосита иштирок этиши ҳамда ихтисослаштирилган спорт мактабларининг фаолияти билан танишиб чиқиши асносида спортчилар, уларнинг ота-оналари, мураббийлар билан суҳбатлари ва улар  билан ўтказиладиган сайёр қабуллар давомида кўплаб масалалар ўз ечимини топиши назарда тутилган.

Шу ўринда айтиш лозим, бугунги кунда Спорт вазирлиги томонидан тузилган ишчи гуруҳ аъзолари мамлакатимиздаги мавжуд Олимпия ва паралимпия спорт турларига тайёрлаш марказларида, олимпия ва миллий спорт турлари бўйича давлат ихтисослаштирилган мактаб-интернатларида ўтаётган ўқувчи-спортчиларнинг қишки аттестация жараёнларида бевосита иштирок этмоқда.

Спорт вазирлиги Матбуот хизмати