Спорт вазири Самарқанд вилоятида оммавий ва профессионал спортни ривожлантириш ишлари билан танишди

Ташриф давомида Булунғур, Жомбой ва Самарқанд туманларидаги спорт мактабларининг фаолияти, "Беш ташаббус олимпиадаси" мусобақаларини ташкил этиш, мазкур спорт мусобақаларига уюшмаган ёшларни қамраб олиш кўрсаткичи таҳлил қилинди.

Аҳолининг жисмоний тайёргарлик даражаси спорт синовларини қабул қилиш ҳолати ҳам ўрганилди. Мазкур тадбирнинг аҳамияти ҳақида жамоатчиликнинг хабардорлигини ошириш юзасидан кўрсатмалар берилди.    

Спортчиларни нуфузли спорт мусобақаларга тайёрлаш, ERP спорт тизимини соҳага тадбиқ этиш юзасидан спортчилар ва тренерлар билан суҳбатлашилди. "Яшил макон" умуммиллий лойиҳаси доирасида бажарилаётган ишлар билан танишиш асносида, спорт мактаблари ҳудудига дарахт кўчатлари экилди.

Айни вақтда Самарқанд шаҳрида замонавий Гимнастика маркази барпо этилмоқда. Спорт вазири қурилиш жараёни билан яқиндан танишди. Лойиҳада кўрсатилган ишларни сифатли ва ўз вақтида бажарилаётганига эътибор қаратилди.   

Мавжуд спорт объектларидан самарали фойдаланиш, уларни сақлаш, таъмирлаш, спорт анжомларидан фойдаланиш ҳолати  туман ҳокимлари иштирокида кўздан кечирилди. Аҳолининг жисмоний фаоллигини ошириш, спортчиларни ҳар томонлама қўллаб-қувватлашда ўзаро ҳамкорлик муҳим аҳамият касб этиши таъкидланди. Бу борадаги ишларни самарали ташкил этиш юзасидан масъулларга зарур тавсиялар берилди.