Спорт вазирининг навбатдаги ташриф манзили Қўҳна кент бўлди ФОТОГАЛЕРЕЯ

Дастлаб, ўрганиш ишлари Футбол академиясидан бошланди. Янгидан фойдаланишга топширилган муассасада 154 нафар ёшлар футбол билан мунтазам шуғулланмоқда. Мазкур академиянинг ёпиқ иншооти қурилиши билан танишилар экан,  қурувчи ташкилот вакилига лойиҳада  кўрсатилган ишларни сифатли бажариш юзасидан топшириқлар берилди.

Енгил атлетика ва теннисга ихтисослаштирилган спорт мактабининг замонавий биноси, ўйин майдонининг ҳолати ўрганиб чиқилди. Теннис мажмуасида жиҳозлаш ишларини якунига етказиш, бинони тез фурсатда фойдаланишга топшириш зарурлиги таъкидланди. 

Спорт вазири вилоят олимпия ва паралимпия спорт турларига тайёрлаш марказига қарашли мажмуада ҳам бўлди. Вилоят якка кураш спорт турларига ихтисослашган спорт мактабида спортнинг карате WКF тури бўйича ўтказилаётган мусобақани кузатиб борди. 

Шунингдек, 2-сон спорт мактаби фаолияти билан танишилди. Мазкур мактабда шуғулланаётган бадиий гимнастикачи Вилана Свадян билан учрашиб, спортчининг Зулфия номидаги давлат мукофоти билан тақдирланганини яна бир бор эътироф этди ҳамда унга муваффақият тилади. 

Шунингдек, вазир томонидан профессионал спортчиларни тайёрлашда мураббийларнинг алоҳида ҳиссаси борлиги ва бу борада Самарқанд тажрибасини оммалаштириш юзасидан таклиф ва тавсиялар берилди.