Спортнинг техник ва амалий турлари ривожи йўлида

Аҳолининг турли қатлами, хусусан, ёшлар қалбига она-ватанга меҳр ва садоқат ҳиссини сингдириш, уларни ҳарбий-ватанпарварлик руҳида вояга етказиш, қолаверса, ўғил-қизлар орасида спортнинг техник ва амалий турларини янада оммалаштириш, бунинг баробарида, жисмонан ва маънан баркамол бўлиб ўсишларини таъминлаш Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши ва унинг тасарруфидаги ташкилотларнинг асосий мақсадлари сирасига киради. 

Яқинда Марказий кенгаш томонидан ёшлар ўртасида спортнинг пневматик қуролдан ўқ отиш, ёзги биатлон ва дуатлон турлари бўйича янги уч босқичли мусобақа  йўлга қўйилди. Табиийки, бу кўзланган эзгу ниятларнинг ушалишига хизмат қилмоқда.

Бинобарин, Хоразм вилоятида ушбу мусобақанинг биринчи - туман (шаҳар) босқичлари бўлиб ўтди. Унда “Ватанпарвар” ташкилоти вилоят кенгаши тизимидаги ўқув муассасалар ҳамда ўқув спорт техника клубларида таҳсил олаётган ва “Ёшлар дафтари”га киритилган жами 1248 нафар ўқувчи юқорида қайд этилган спорт турлари бўйича ўзаро баҳс юритишди.

Табиийки, ғолиб ва совриндорлар тақдирланиб борилди. Эндиликда, уларнинг энг яхшилари вилоят босқичига шай туришибди.  

Одилбек ИБРАГИМОВ (Хоразм вилоят техник ва амалий спорт турлари маркази директори):

- Муболаға эмас, бу мусобақа ўзига хослиги ва аҳамияти билан муҳим ҳисобланади. Зеро, жойларда ўтказилган беллашувлар иштирокчиларга кўтаринки кайфият, унутилмас таассурот ва қувончли лаҳзаларни туҳфа этди. Унинг эътиборли жиҳати яна шундаки, биринчиликда фаол қатнашганлардан 672 нафарига спорт тўгараги аъзоси эканлигини тасдиқловчи гувоҳномалар топширилди. Эндиликда, мазкур гувоҳнома эгалари ташкилотларимиз қошида фаолият юритаётган спорт секцияларидан доимий равишда, ўзларига қулай вақтларда фойдаланишлари мумкин бўлади.

Ҳа, “Ватанпарвар” ташкилоти ўз олдига хайрли вазифаларни қўйган. Бу борада олиб борилаётган изланишлар эса бесамар қолмаяпти, албатта. Бунинг самараси, болалар, ўсмирлар ва ёшлар ушбу ташкилотга ўзгача меҳр билан қарашмоқда, спортнинг техник ва амалий турларига қизиқиши тобора ошаяпти.

Икром ХУДОЙБЕРГАНОВ, Урганч шаҳридан