СССР терма жамоасининг собиқ дарвозабони иттифоқ даврида келишилган ўйинлар қандай ташкил этилганини айтди

 У интервью давомида бундай ўйинлар билан боғлиқ бир нечта воқеаларни эслади. 

— Фаолиятингиз давомида бирор марта келишилган ўйинда иштирок этмаганмисиз?

— Нима билан қасам ичишим керак бўлса ҳам, йўқ! Ҳеч қачон иштирок этмаганман. Агар бутун жамоа келишган бўлса, унда мен ҳам қатнашган бўламан. Бир марта шундай ўйин бўлган, лекин келишув ҳақида фақат кейин, менга пул олиб келишганида билдим.

— Қандай ўйин эди?

— Киевда “Динамо”га қарши ўйнаган эдик.

— Адашмасам, 0:5 ҳисобидаги мағлубиятми?

— Йўқ, 1:2 ҳисобида ютқазганмиз. У ерда кулгили вазият юз берган. Газзаев 40 метрлардан тўпни дарвоза тўққизлигига жойлади. Кейин эса томоша бошланди: қандайдир пенальтилар...

Кийиниш хонасида менга 200 ёки 250 рубль беришди. Ҳайрон бўлиб: “Нима учун?” деб сўрадим. “Сўрама”, дейишди. Мен ҳам бошқа савол бермадим.

Аммо Киевда 0:5 ҳисобида мағлуб бўлганимиз аниқ келишилган ўйин эмас эди. Келишилган учрашувлар бундай ўтмайди.

— Бизда келишилган ўйинларга оид иккита воқеа бор. Сиз уларга изоҳ берсангиз.

— Қани, айтаверинг!

— Борис Поздняков Кутаисидаги ўйин ҳақида гапирган эди. Ҳар бир футболчига 500 рублдан пул олиб келишган: “Пулни сизларга берамиз ёки ҳакамларга. Ўзингиз ҳал қилинглар”, дейишган. Овоз бериш бошланган. “Мен, Стукашов ва Прудников қарши чиқдик, қолганлар эса рози бўлишди. Аммо ҳакамлар билан барибир кураша олмаслигимизни, ютқазишимизни тушуниб, пулни олдик”, деган эди у.

— Буни биринчи марта эшитяпман!

— Ростданми?

— Мен бошқа воқеани биламан. Душанбе шаҳрига борганимизда дарвозабон Мананников катта бир пакетни кўтариб келди. Мен бунчалик кўп пулни ҳеч қачон кўрмаган эдим.

— Пулни сизга олиб келганмиди?

— Ҳа. Мен унга: “Бу менга тегишли масала эмас, йигитларнинг олдига бор”, дедим. Охир-оқибат пакет ростовлик ҳакам Тимошенконинг қўлига ўтди. У пенальти белгилади — тўп майдон марказида турган пайтда! Биз 0:1 ҳисобида мағлуб бўлдик. Қани, кейинги воқеангизни айтинг.

— Бу воқеани Алексей Прудников айтиб берган. Уйда Кутаисининг “Торпедо” жамоасига мағлуб бўлишганидан кейин Эдуард Малофеев кийиниш хонасида Прудниковга ташланган: “Нега ўйинни сотдинг?” Прудников эса: “Мен захирада ўтирган эдим-ку”, деб жавоб берган. Малофеев: “Нима бўпти? Сен жамоа сардорисан!” деган экан.

— Эдуард Васильевичнинг ўзига хос фикрлаш тарзи бор эди. Ҳамма нарсага “шашка яланғочлаб” ташланарди. Ростини айтсам, Кутаиси билан ўйин келишилган бўлган деб ўйламайман. Гарчи... Ҳозир ҳар қандай эҳтимолни истисно қилмайман!

— Сизни бундай ишлардан хабардор қилишмаганми?

— Йўқ.