Стол тенниси. Ўзбекистон Кубоги кимга насиб этди?

Кеча ушбу мусобақа ўз якунига етиб, ғолиб ва совриндорлар номи маълум бўлди. Мамлакат кубогида Қорақалпоғистон Республикаси, барча вилоятлар ҳамда Тошкент шаҳридан жами 25 та жамоа бош соврин учун баҳс олиб борди. 

Эркаклар ўртасидаги ҳал қилувчи финал учрашувида Тошкент вилояти жамоаси пойтахтлик стол тенниси усталарини 3:1 ҳисобида мағлуб этиб, Ўзбекистон Кубоги-2023 соҳибига айланишди. Қорақалпоғистон ва Самарқанд жамоалари шоҳсупанинг учинчи поғонасидан жой олишди. 

Аёллар ўртасидаги мусобақада Тошкент шаҳри жамоаси Ўзбекистон Кубогини қўлга киритди. Пойтахтлик стол теннисчилар муросасиз кечган финал учрашувида Наманган жамоасидан 3:2 ҳисобида устун келишди. Андижон ва Тошкент вилояти жамоалари кучли учликка якун ясаб беришди. 

Ўзбекистон Кубоги якунига етгач, ғолиб ва совриндорларни тантанали тақдирлаш маросими ўтказилди. Ушбу тадбирда Сирдарё вилояти ҳокими вазифасини вақтинчалик бажариб турган Акмаджон Маҳмудалиев, Ўзбекистон стол тенниси федерацияси раисининг биринчи ўринбосари ва ижрочи директори Исломжон Байханов, Федерация раиси ўринбосарлари Баҳром Саидов, Григорий Хван, Ёшлар сиёсати ва спорт вазирлиги Сирдарё вилояти бўлими бошлиғи Анвар Бобонов ва бошқа мутасаддилар иштирок этишди.